Se kaam op 13 septimber 1906 as 11e te wrâld yn in húshâlding dêr’t mem trettjin bern krije soe. De earste lichting seach it libbensljocht yn in pleatske oan de Warstienzer dyk en de twadde yn Werkmanslust, in saneamde feanklinte oan in opfeart djip yn de Alde Feanen, op it stee dêr’t in pear jier letter de mânske Achttjin Mêd ferrize soe.
Har jierdei, mar ek dy fan oare broers en suskes, giene meast sûnder in soad omtinken foarby. Sokke dagen wiene yn dy grutte húshâlding dagen krektlyk as alle oaren. Mar op 13 maart wie dat lykwols oars. Op dy dei wiene twa fan har broers, Gerrit en Klaas en har suster Janke tagelyk jierdei. Se wiene om de twa jier op deselde dei berne. Soks wie wol in bytsje feest wurdich en iet de húshâlding 'stro' mei sjerp.
It ferhaal hinget oan beppes âlde pankoeksmes dat sûnt jierren by my yn’t keukenslaad leit. Hjoed, 13 septimber hie se (it famke, yn har sniewite jurkje en mei it kopke keal skeard om luzen te kearen, dat foar har heit stiet) jierdei west.
Foto: de húshâlding fan Johannes en Akke Steenbeek om 1909 hinne neist de nije foarein fan de âlde feanklinte 'Werkmanslust', letter neamd de 'Achttjinmêd'.
